Charlotte B 聽電話

昨晚我跟Ashley及Charlotte B玩時，手提電話響起，我拿起聽。
當我收綫後轉回頭望兩位sweeties時，Ashley突然叫, "Charlotte B學媽媽聽電話啊!"
我望一望Charlotte B，佢竟然把左手放在左耳上，模仿我在聽電話...我不禁笑起來，就連佢自己都在笑...
我估計平時佢時常看到我和爸爸 (甚至Tinah) 在講電話，所以懂得做聽電話的動作!!!!

媽媽新鞋

今天送Ashley返學時, 穿上一對新鞋。 因為新鞋的緣故，所以有點兒刮腳。 當我自言說, 對新鞋有點兒刮腳, 有點兒痛。  Ashley就問, "點解刮腳?"  我答, "因為新鞋囉!"
在爸爸還沒有反應時, Ashley就擺出一副好自信地的神態, 說,"噤就唔好着呢對新鞋囉!"
Ashley又正確喎....

Charlotte B自己紮頭髮

一向Charlotte B在飲奶及吃粥的時候, 都要給她一些玩具或物件, 佢才會乖乖地飲奶及吃粥。 
有一次餵佢吃粥的時候, 我俾家姐紮頭髮橡根繩予Charlotte B玩, 佢立刻把該橡根繩放在頭上。
原來Charlotte平時看見Tinah替Ashley紮頭髮, 都是拿這條橡根繩的, 所以佢有樣學樣, 把橡根繩放在頭髮上, 以為紮頭髮, 真係好攪笑!!!

返根德園幼稚園，好嗎?

有一晚，我跟Ashley睡覺時，我問她喜不喜歡返學, 她說喜歡。
之後，我告訴她下年要到根德園幼稚園返學, Ashley頓了一頓, 問為甚麼, 仲話喜歡迦南幼兒園。
我說, "因為你已大個啦, 要係根德園讀書."
佢說, "迦南幼兒園都有大個啲讀㗎!"
我想一想, Ashley無錯喎, 迦南幼稚園有K1-K3, 所以佢見到大啲的哥哥姐姐, 所以我又說,"根德園校園大啲, 有滑梯."
Ashley答, "我唔玩滑梯, 我鐘意迦南幼兒園...仲有, 如果去根德園幼稚園, 我見唔到Miss Lee呀!"
我頓時沒話好說, 只好重覆, "因為你已三歲啦 , 要學多啲嘢, 所以要去根德園。根德園有好多嘢學呀..."
Ashley說, "我驚驚, 媽媽陪我入去啦!"
我再說, "好啦, 我第一日陪你入去啦...第二日要自己入去㗎..."
Ashley說, "唔得, 第二日都要媽媽陪..."
我說, "好啦, 媽媽陪你, 第三日要自己入去啦..."
Ashley說, "第三日都要媽媽陪!"
我再問, "噤第四日呢?"
Ashley答, "都要..."
我再問, "第五日呢? 第六日呢?"
Ashley答, "都要, 都要..."
我說, "爸爸陪你入去好嗎?"
Ashley答, "要媽媽, 爸爸企喺出面等..."
真給Ashley沒辦法, 現在唯有先答應佢, 遲啲先再算啦.....

Charlotte B悶嗎?

每天早上，我們都趕着返工、返學，匆匆跟Charlotte說拜拜就離開, 剩下Charlotte和Tinah在家。
有時我在想Charlotte會不會悶呢?  終日流流長, 真不知佢悶唔悶?
不過，佢見到我們回家時, 表現得非常興奮, 仲會尖叫起來 (Charlotte一興奮就會尖叫㗎!!!)...所以我肯定佢十分喜歡或期待我們回家....
Charlotte 仲好八卦, 如果我打開櫃桶, 佢會爬過來攪攪震...把櫃桶裏的東西翻出來...唔知係唔係佢平時太沒事做呢?!

Charlotte B要姐姐!!!!!

昨晚趁Ashley睡後, 我欲抱抱Charlotte B....當時, Charlotte B是由Tinah抱着, 已在半睡當中...

怎知當我從Tinah手中接過CharlotteB後. Charlotte B竟哭起來, 還越哭越大聲, 不停叫"姐姐"...
Tinah曾一度想抱回Charlotte B, 但我堅持要由我抱...

Charlotte B不停地哭着, 還用力踢開我, 想離開我的懷抱...由於Charlotte 不停地掙扎, 故我放她在地上, Charlotte似有意識地望着厨房, 似要找Tinah....

好擔心呀, Charlotte B開始親Tinah多於她媽媽...實在有點兒傷心....都怪自己平日太少時間陪佢...
由於我不想Charlotte B習慣了由Tinah抱着呵睡覺, 我堅持由自己抱她...幸好, Charlotte B最終肯讓我抱着..最後由我懷中睡着了...

由此事件, 我真的要注意了.....唉! 可是我又要上班, 大部份的時間都只得Tinah照顧Charlotte B!!!!  做媽媽的我真無奈!!!!! 只可儘量在放工後及假期多跟Charlotte B玩玩, 不然佢真的會要姐姐, 不要媽媽啦!!!!! 

Charlotte B 生日

昨天3月22日是Charlotte B一歲生日, 其中一份禮物是到健康院打針!!!!
雖然我們已經提早於3月6日慶祝了, 但始終係正日, 所以我於接Ashley回家時買了一個蛋糕仔, 打算跟Charlotte B慶祝...
當我跟Ashley說要為Charlotte B買蛋糕時, Ashley竟說 "今天是我生日, 我要買蛋糕....."
我答, "不是你生日, 你是在3月11曰生日:..
Ashley扭計堅持地說, "我(強話氣)生日呀!!"
我說, "你已經過了生日, 媽媽不是跟你開了生日會嗎?! 你已切了Thomas蛋糕..."
Ashley開始哭閙, "我再生日嘛!"
最後, 為了平息Ashley的哭閙, 我只好和應佢, 話佢今日生日...
結果Ashley真的以為是自己生日, 拿着刀切蛋糕, 仲有板有眼合起雙眼許願...真無佢收!!!!!!

惡婆

Charlotte B很惡㗎!!!!
昨天, 家姐搶她手上的物件, 佢竟然雙手由上拍打下來 (好像在打人), 然後"吼叫"家姐, 好像在罵人點解要搶走佢的東西, 樣子很惡呢....(其實樣子很可笑, 兩顩肥嘟嘟, 很惹人歡笑㗎!!!)..
呢個惡婆又喜歡跟家姐玩, 當家姐逗她笑, 她會哈哈大笑, 真係開懷大笑嗰隻....

打破媽媽相架

昨天, 我在鞋櫃上寫便條, Ashley見狀, 嚷着要寫字, 我敷衍她說"不可"....
怎知轉頭行開的時候, Ashley雙脚"Un"高(因她不夠高), 意圖取鞋櫃上的白紙來寫字, 在她扯下白紙的時候, 在白紙上的相架也一併扯了下來, 相架"捧"一聲跌在地上, 被打破了...
Ashley很害怕, 站在原地一點也不動, 我和爸爸見狀, 害怕Ashley會被相架碎片弄傷, 故我嚴厲地叫Ashley不要動....
在這時, 其實我已發覺Ashley眼濕濕, 想哭的樣子....原本想駡她, 但看見佢這副可憐的樣子, 我心軟了, 故把她抱在懷中, 着她不要怕, 下次要聽媽媽的話...
誰知Ashley好像釋放了, 把忍着的哭聲抒發出來......突然放聲大哭...
我知道Ashley明白自己做錯了事, 故眼汪汪, 想哭樣子....最後, 由於我的擁抱, 佢才舒懐地哭了出來...

親子一日遊

Ashley幼兒園3/18一日遊, 地點係錦田鄉村俱樂部..我尊程請了一天假, 和爸爸一起出席.....
估唔到有很多人, 總共有九部車, 每車有四十多人....大部份父母兩位都出席...現今小朋友真"京"貴...

其實, 這次旅行的目的地沒甚麼吸引, 只是有一大片草地, 讓小朋友跑跑, 玩玩集體遊戲比賽等, 看看小兔, 金鱼, 羊等小動物, 但Ashley話佢地有啲臭喎, 所以佢沒有很大興趣..

活動當中, Ashley最喜愛摘士多啤梨, 及撈金魚.....事後還十分欣賞自己所摘的士多啤梨, 仲話很好味呢!

其實我覺得Ashley只要可以同一班同學一起玩, 一起吃零食, 就會開心, 佢地點知這裏是甚麼錦田鄉村俱樂部呢!!!!!!!

學英文, 又告失敗!

鑒於Ashley害怕那個黑忟忟男西人, 我已放棄餘下的課堂....
適逢同學仔趙康晴的媽媽介紹, 我又替Ashley報名學phonics...
原本以為有趙康晴為伴, 加上老師是女西人(紅髮, 藍眼睛嗰類), Ashley會不怕...
可惜, 當婆婆走出課室後, Ashley就哭起來, 仲係很大聲嗰類, 一定要婆婆陪伴在側....
之後問Ashley仲去唔去學英文, 佢就話唔去.....
唉! 都唔知點收料!!!!! 都唔明點解佢噤怕啲西人....

Charlotte B 甩褲...

不知是否褲太大的緣故, 近來Charlotte經常甩褲, 尤其是當佢在BB床跳跳的時候....甩咗褲之後, 就見到Charlotte雙腳光兀兀, 只剩尿片,  好鬼攪笑..
而當Ashley見到Charlotte甩褲, 佢就會大叫, 且指着Charlotte叫, "嘩, Charlotte又除咗褲啦 !!!!"

奶粉!!!

現在撲買奶粉已是一個hot topic...原本以為吃日本奶粉不會有貨源短缺的問題, 因為大陸人只喜歡A+, 美素佳兒等歐美品牌奶粉...所以一心安排Charlotte B轉飲明冶大仔奶粉, 跟家姐一樣...
可惜一個日本大地震, 搞到香港奶粉也大地震, 日本奶粉嚴重缺貨,
即使有貨, 無良的商人也坐地起價....
為了不甘心被這些無良的奸商"要脅", 我决定為Charlotte B轉奶粉...

勞作作品 : 廚師帽

想同大家分享吓, Ashley在校裏做咗頂厨師帽(廢物利用), 係學校教的....好唔好睇呀!

去街街...

Charlotte B很喜歡去街街, 每次擺佢在BB車時, 佢都會挺直身坐, 又會自動將BB車座位前的欄扣好 (當然只是有意圖去做, 佢怎能扣到呢!!!!)...
落到街, 佢還會興奮地叫喊...

昨天帶Ashley and Charlotte 去黃埔玩具反斗城, 店內有一個BB玩具, 類似學行車, 放BB落去, 佢地可以"Un (jump) 吓, Un吓"....

記得以前Ashley細細個時, 曾經放佢落去玩過, 但一放佢落去, Ashley就立刻喊, 好鬼細膽!
Charlotte B 就唔同, 佢以乎好喜歡這玩具, 一點也不害怕....大瞻過家姐好多呢!

快啲啦!

今早帶Ashley返學時, Ashley跟我說"快啲啦! 我要第一!"
原來上星期五, 因為我要9:30am到沙田法院, 所以一早8:30am就帶Ashley回到學校...因太早緣固, 我們還在校門外等了數分鐘, 學校才開門..Ashley那天是第一個回到學校的...
不知是否是第一個回到學校, Ashley領會到有一種優越感, 所以今早希望再一次是第一個到學校...可惜, 我們又係臨鐘聲響前一刻才回到學校呢!!!!!

Ashley生日

今天三月十一日是Ashley生日, 雖然已經於上個星期日替地搞了生日會, 但始終今天是正日, 所以我打算放工買一個蛋糕俾佢, 給她一個驚喜..

很快地Charlotte B也生日了 (三月二十二日), 一歲啦!  佢現在可站得穩, 爬得快, 但仍未曉走路...
講開Charlotte B, 佢都幾惡呀!  如果你從她手上拿走佢正玩着的玩具, 佢會發出很大的聲音, 像在罵你一樣, 而且亦會牢牢地抓緊那個玩具, 不讓你搶去...正一惡妹嚟架!!!! 
另外, 如果你放佢獨個兒在床上, 又走開, 而又沒有其他人理睬佢, 佢就會大叫, 還叫到面紅紅, 直至有人應佢為止....

媽媽咳咳

最近我患上感冒, 聲線變得非常沙啞, 昨天還開始有嚴重的咳...
昨晚陪Ashley睡覺時, 因為咳得太厲害, 我就打趣地跟Ashley說, "媽媽會死啦, 你會冇媽媽啦..."
Ashley聽後, 立即扁咀哭起來, 還要抱着我....
結果我要安慰佢話媽媽唔會死, Ashley才乖乖地去睡...
怎知今早起床後, 我先到洗手間梳洗, Ashley起身時看不到我, 唔知係唔係以為我死咗, 立刻大哭起來...即使我大叫媽媽在廁所, 佢仍然在哭, 還走到廁所門口拍門要我..
之後又要我抱着她飲奶...好像不可以和我分離....
都怪我昨晚不好, 跟她開玩笑說媽媽會咳到死, 嚇得Ashley以為佢真的會冇了媽媽....

Bye...Bye...

Charlotte B 識得跟你揮揮手拜拜啦...
當我們離家時, 跟Charlotte揮手說拜拜, Charlotte B也會揮揮手, 像向我們說拜拜....

上英文堂(三)

結果Ashley沒有去上堂..

婆婆話當佢問Ashley去唔去學英文時, Ashley話"唔去".
然後婆婆就話, "如果唔去, 就要睡午覺..如果唔睡覺, 就要去上堂.."
Ashley立刻應承瞓覺, 還快速地拿着奶樽跑了到床上去, 自己躺在床上乖乖飲奶..
不消一會兒, 當婆婆從厨房走到睡房時, 想看看Ashley情况, 誰知Ashley已睡着了, 空空的奶樽跌在旁邊了...

上英文堂(二)

今早我再嘗試說服Ashley去上英文堂, 還威嚇佢如果唔去上英文堂, 就冇得去Disneyland 及海洋公園, 點知佢反說, "我唔去Disney啦"....唉! 我都要放棄了, Ashley真的萬分不願意去上英文堂, 就連佢最喜愛的Disney都可以放棄...幸好我問佢去第二度上英文好唔好? 佢答 "好"...這證明佢不喜歡該老師啫...不是不喜歡學英文...
為免Ashley害怕了英文, 影響深遠, 我决定不用她去了.....

上英文堂

今早帶Ashley返學時, 問佢今日要學跳舞, 好唔好?
佢答, "好呀!"
我就打蛇隨棍上, 繼續問, "明天要上英文呢?"
佢立即哭着說, "唔去學英文呀...唔去呀..."
我續說, "要上英文堂, 才可以去Disneyland, 同Mickey講英文㗎.."
但Ashley仍說, "唔學英文..."
唉! 出動埋去Disneyland的引誘都不能說服到Ashley, 我估Ashley實在不喜歡那個外藉老師, 我想還是放棄吧, 都要浪費了餘下的學費...算吧啦!

生日會

Ashley三歲生日啦!
Charlotte 一歲生日啦!
我和爸爸決定於三月六日(昨天)為這兩位sweeties攪生日會..
適逢Ashley的同學趙康睛也是在三月出世, 所以我們一起攪birthday party...熱閙啲!!!
我們選擇了半島豪庭clubhouse內的卡拉OK房+桌球房, 將兩房打通, 地方就較大...比地面宴會廳容納多些人..
我們兩家人的賓客合共60多人 (包括小童20多人)...

Ashley很高興, 之前當佢頑皮扭計的時候, 我會用"唔開生日會"來"威嚇"佢, Ashley果真害怕沒有生日會, 故會聽話...

昨天Ashley很開心, 一直跟小朋友玩, 又拿咪唱歌, 完全沒有"痴"住我, 好像有自己朋友的圈子..
為了熱閙一點, 我們請了魔術師, 跟小朋友玩遊戲, 變魔術, 扭汽球...老實說, 我個人認為魔術表現頗悶, 但小朋友們很開心, 可能這個魔術師迎合到小朋友的口味啦.....所以都值得㗎!

魔術表演時段

生日會的高潮係切生日蛋糕, 因Ashley喜愛藍色, 故佢選擇了Thomas蛋糕, 而我就替Charlotte揀了"開心樂園", 有小兔及小豬公仔....Ashley很高興, 又吹爉燭, 又吹生日歌....整天跟趙康晴崩崩跳...

Charlotte B因為太細了, 可能不知道媽媽為佢攪生日會, 但佢看魔術表演時很興奮, 手舞足蹈, 當切蛋糕時, 佢只係對把生日刀有興趣, 俾佢激死!!!!!

因為開生日會緣故, Ashley沒有午睡, 換着平日已於黃昏時扭計, 但昨天竟然沒有扭計, 於晚上10:00已入睡了, 而Charlotte B一早於9:00多就喝奶入睡了......

Ashley 眼發炎

星期二早上起床後發現Ashley有很多眼糞,
晚上接佢返家時, 婆婆話Ashley常常擦眼睛, 似痕癢...
到了星期三晚上, Ashley眼睛有紅根, 而且佢又有咳及鼻水, 所以我帶了佢去看醫生...
醫生話Ashley眼晴發炎, 要滴眼藥水....
當替Ashley滴眼藥水時, 佢似很怕, 把眼晴緊緊合上, 結果我要刻意用手掙開佢隻眼才可滴眼藥水, 誰不知Charlotte B見狀, 爬過來, 用手拍拍Ashley的面, 佢以為我也是這樣做, 所以才有這樣動作, 結果令Ashley大叫, 真是越"幫"越忙!!!

搬新屋

終於搬返半島豪庭啦!
問Ashley喜歡住半島豪庭或是黃埔花園,
佢答, "半島豪庭"
我問, "點解?"
佢答, "因為半島豪庭大啲"